miércoles, 10 de octubre de 2012

Cimadevilla la del "Retablu del Mar y su Xente Marinera"

MARISQUEANDO

"Pocos diben a estos menesteres, pero menos eren los consumidores. Si ellos cogen estos tiempos, nadaben en perres nuestros mayores."

A la esguila empleaben los tarrafinos fechos de pañu de malla fina, pa al halalos no marchasen por ella, quedando todes en la bolsiquina. Encarnaben con cuerpo de raya o pex con mucha carne pegá en espina, poníenla en los cuatro tirantes en el mediu, safandoi la bordiquina. Llegaben a la mart con remu abríen calle, esparciéndolos en trena, daben lo precisu en tira; pal halalos, dexaben les boyes a la buena. Basculaben la esguila en una caxa y echábenlos con nueves carnaes, mientras daben posu, escogíen la pequeña, la grande y de les terciaes. Metíenles en unes bolses de rede y al costau del bote fondiábenles, en elles aguantaben vives, brincando, como acabante de pescales. Muchos teníen el abonu de los mares del Castrillón o "cagamarranes", andábase por "otres agues", pero toos veníen a tierra por les mañanes.

"Con estos mismos artes y les mismes carnaes, la mar daba a montones, andarica, camarón, zapateru,burón, bugres, centollos, ñocles y pelones "

Pol tiempo del oriciu, en el cascallu con un lampazu en pingarata, que era un cachu de cadena en un cabu, amarrá a rede liá en reata. Por encima de les llastres a los oricios pegaben asina la llambiá, atabenlu a un bancu del bote y remando pali a pali daben una pasá. Metíenlu a bordo dexando de bogar pa despegar y esoger la oriciá, si yos cubría empezaben de nuevo en la contra, pegando otra raspiá. Diben pa macizar los mirlotos y llevar algún pa los neños de la casa, los más agudos escogíen grandes pa vender a la puerta de la plaza.
Pa arranchar de estos artes non facía falta gastar de ningún capital, rede vieya pa ellos tirá por la Talaya taba apañar ¡ganancia total!
Por NOTI

No hay comentarios:

Publicar un comentario